مواجهة ورشق بالحجارة فاش كانوا كيخويو الديور ديال دوار عين برجة فكازا.

باشرت السلطات المحلية بمدينة الدار البيضاء، هاد الثلاثاء، عملية إفراغ واسعة شملات بزاف ديال الديور اللي تابعة لوكالة المساكن والتجهيزات العسكرية بدوار عين برجة، فمنطقة الحي المحمدي. هاد العملية دازت وسط استنفار وتطويق أمني كبير لضمان تنفيذ الإجراءات التنظيمية، لكن الأوضاع عرفات توتر ملحوظ بسبب رفض بعض السكان مغادرة المنازل ديالهم. التطورات الميدانية عرفات وقوع مواجهات متفرقة بين المحتجين وعناصر القوة العمومية، تخللها رشق بالحجارة، قبل ما تتدخل المصالح الأمنية باش تفرض الهدوء وتضبط الوضع، الشي اللي سمح باستكمال عملية الإخلاء. وحسب مصادر من عين المكان، خلفات هاد المواجهات إصابات في صفوف عناصر من القوات المساعدة والأمن الوطني اللي تنقلوا للمستشفى باش يتلقاو العلاجات، كما تسجلات حالات إغماء وسط بعض السكان كبار السن نتيجة الضغط والتوتر اللي ساد فالمحيط.