مصر غارقة فظلمة.. بدا لعمل بقرار “ترشيد تريسيتي” لّي كايفرض سدّان يومي شامل مع تِسعود دالليل، فكاع لمدون بما فيها القاهرة، ومن غير لبلايص السياحية.

عرفات شوارع العاصمة المصرية القاهرة هاد اليومين حالة استثنائية من “الظلام القسري”، بعد ما بدات السلطات فتنفيذ خطة استعجالية لترشيد استهلاك الضو بسبب الأزمة الطاقية الدولية والتوترات الجيوسياسية فمنطقة الشرق الأوسط اللي غلات ثمن الوقود. وأعلن رئيس الوزراء، مصطفى مدبولي، بلي فاتورة استيراد المحروقات تضاعفات فوقت وجيز، داكشي علاش قررات الحكومة تسد المحلات والمطاعم مع 9 دالليل، وتخفض إضاءة الشوارع والإعلانات بـ50%، مع تقليص ميزانية البنزين للسيارات الإدارية بـ30%. الخطة شملات حتى اعتماد “الخدمة عن بعد” نهار الأحد لتقليل التنقل، ووقف المشاريع الكبرى اللي كتستهلك الطاقة بزاف لمدة شهرين. وباش تحافظ الدولة على المداخيل الصعبة، تم استثناء المناطق السياحية بحال الأقصر وشرم الشيخ، وكذا الصيدليات ومحلات التغذية، من هاد القيود. هاد الإجراءات، وخا جات من بعد زيادة فأسعار المحروقات، كتقسم الآراء بين اللي كيشوفها ضرورة لضمان استقرار الشبكة الوطنية وتفادي الانقطاعات، وبين اللي متخوف من تأثيرها السلبي على الحركة التجارية والنشاط الاقتصادي اليومي للمواطنين.